(AGENPARL) – lun 04 dicembre 2023 COMUNICÂT STAMPE
PALAÇ CLABASSI
Vie Zanon 22, Udin
MARTARS AI 5 DI DICEMBAR DAL 2023
Aes 18.30
PRESENTAZION DE
“MAPE CHE E FEVELE” DI UDIN
Ancje chest an il Ministeri de culture al aderìs ae Zornade internazionâl dai dirits des
personis cun disabilitât dai 3 di Dicembar, istituide tal 1992 de ONU. Al promôf i siei
valôrs e al definìs tant che obietîf principâl chel di passâ lis barieris fisichis, cognitivis,
sensoriâls e culturâls tai lûcs de culture, cul sproc consolidât “Une dì par an dut l’an”.
Inte suaze dai events programâts a nivel nazionâl, martars ai 5 di Dicembar dal 2023 la
Sorintendence Archeologjie, bielis arts e paisaç dal Friûl-Vignesie Julie e presente tal Palaç
Clabassi la gnove Mape che e fevele dedicade ae citât di Udin, realizade de Fondazione
Radio Magica ETS, une realtât che si impegne di simpri a garantî la massime acessibilitât
dal patrimoni culturâl regjonâl.
La presentazion e je stade pensade tant che un spetacul speciâl pes fameis, indreçât a un
public di ogni etât, dulà che si alternin la recitazion, la musiche e la ilustrazion dal vîf.
La citât di Udin, duncje, si conte cun narazions semplicis e plasevulis che a pandin
curiositâts su la citât, su la sô storie e la sô art, dant la peraule a personaçs che le àn vivude
o che a àn contribuît a fâle deventâ famose. I protagoniscj dal spetacul a saran il pinel di
Paolo Cossi, lis musichis di Luigina Feruglio, lis vôs di Elvio Scruzzi, Flavia Valoppi e
dai arlêfs di Radio Magica Academy.
La Mape che e fevele di Udin e propon 25 contignûts audio e video ancje inte lenghe dai
segns taliane. I autôrs des storiis a son Roberto Piumini, Mariaelena Porzio, Elena
Commessatti e Antonella Favaro.
Il progjet al è sostignût de Regjon Friûl-Vignesie Julie e dal Comun di Udin. Ancje cheste
Mape, come dutis chês altris, si pues cjatâle tal sît http://www.radiomagica.org/smartradio in
gracie de colaborazion cul Sasweb Lab de Universitât dal Friûl.
La iniziative des Mapis che a fevelin chest an e à za otignût un risultât une vore impuartant
cul progjet “La Mappa Parlante di Aquileia”. Il lavôr, che al è stât presentât al concors dal
Premi Nazionâl dal Paisaç, rivât ae edizion numar 4, al à meretât un encomi speciâl de
bande dal Ministeri de Culture “pe capacitât di creâ materiâi multimediâi indreçâts ae
valorizazion dal patrimoni culturâl e dal paisaç dal sît UNESCO di Aquilee, fruibii di un
public slargjât, midiant di storiis e curiositâts”.
Ingrès libar fin che a son puescj disponibii
SI CONSEE DI PRENOTÂSI doprant chest leam
https://forms.gle/4VMFUaNaeLS6ou2r8
PROGRAM DAL INCUINTRI
Salûts istituzionâi
Morena D’Aronco
Referente Aree Educazion e Ricercje
Sorintendence Archeologjie, bielis arts e paisaç dal Friûl-Vignesie Julie
E introdûs
Morena Maresia
Sorintendence Archeologjie, bielis arts e paisaç dal Friûl-Vignesie Julie
Intervents
Giovanna De Appolonia
Fondazione Radio Magica ETS
Fondazione Radio Magica e nas di un progjet di ricercje de Universitât Ca’ Foscari di
Vignesie tal 2012 par meti in vore il dirit ae Scolte dai fruts. Za dal principi, e à fissât tant
che so obietîf primari chel di butâ jù lis barieris ae acessibilitât cuntun mieç che al è “tant di
plui che une radio”, cun contignûts ispirâts al design for all par garantî a ducj i fruts e ai
fantats il dirit ae scolte midiant di audiostoriis, videostoriis cu la lenghe dai segns taliane
(LIS) e cui simbui (CAA), tescj a leibilitât alte e tancj laboratoris par imparâ a contâ storiis
(storytelling) e par educâ cu la radio (radio education).
Radio Magica Academy e je la prime Universitât des abilitâts Libaris nassude par che i
zovins cun disabilitât a puedin lâ indenant cui studis supuartâts di docents e educadôrs
esperts in metodologjiis didatichis inclusivis. Parcè che ducj, ancje lis personis cun
disabilitât, a àn il dirit di partecipâ a percors di aprendiment permanent (lifelong learning).
Revision e traduzion dai tescj par cure dal Sportel regjonâl pe lenghe furlane de ARLeF
Revisione e traduzione dei testi eseguite dallo Sportello regionale per la lingua friulana dell’ARLeF.
Triest, ai 30 di Novembar dal 2023
Ufici Comunicazion e Promozion de Sorintendence Archeologjie, bielis arts e paisaç dal Friûl-Vignesie Julie

Soprintendenza Archeologia, belle arti e paesaggio del Friuli Venezia Giulia

https://www.facebook.com/SABAP.FVG