![Logo](https://i0.wp.com/agenparl.eu/wp-content/plugins/Plugin%20Logo/Agenparl.png?w=788&ssl=1)
(AGENPARL) – lun 04 aprile 2022 COMUNICÂT STAMPE
COMUN DI CORDENONS
LOCALITÂT MANERA
CJATADE UNE NECROPOLI ALTE MEDIEVÂL
Intal Comun di Cordenons, in localitât Manera, intant che si faseve vigjilance
archeologjiche aes ativitâts di sgjavament te gjave “Ghiaie Santa Fosca”, une volte
clamade “Villa D’arco”, par un ampliament de superficie estrative, a son stâts cjatâts
rescj di vues, riferibii intun prin moment a cuatri inumazions in fuesse, in part
savoltadis des araduris. Il control ai sgjâfs pal ampliament de aree al jere stât domandât
de Sorintendence competente par vie de presince, dongje dai lavôrs, di un complès
rustic di epoche romane, za documentât, ma che di chel al reste dome un ambient
semisoterani cun pavimentazion di cops e perimetrâi di modons.
I lavôrs, realizâts de societât Ghiaie Santa Fosca s.r.l., a son stâts fats in coordenament
cul archeolic Pietro Riavez de dite ArcheoTest s.r.l., cul jutori de antropolighe Lisa De
Luca, e sot de direzion sientifiche de funzionarie archeolighe Serena Di Tonto pe
Sorintendence Archeologjie, bielis arts e paisaç dal Friûl-Vignesie Julie.
Dopo de scuvierte, si à decidût di lâ indevant cu la indagjin archeologjiche par
delimitâ la aree di distribuzion des sepulturis, verificant ancje la pussibile esistence di
rescj di components struturâi.
Si è duncje rivâts a individuâ disevot sepulturis, cun diviers stâts di conservazion, pal
plui cence furniment funerari: lis pocjis evidencis a àn permetût di datâ lis sepulturis, in
vie preliminâr, ae epoche alte medievâl. Dut câs, dome une part di chês no je stade
savoltade di araduris precedentis, par vie che si cjate a une cuote a pene plui basse.
I rescj a son stâts documentâts e po dopo recuperâts dai archeolics che a operin sul
cjamp sot de direzion de Sorintendence, par podê jessi conservâts in struturis adatis, e in
mût ancje di permeti che a ledin indevant i lavôrs te Gjave.
La necropoli
Lis tombis a son dutis semplicis fuessis te tiere, cualchidune delimitade in maniere
iregolâr di grancj cogui. La plui part e je orientade in direzion Est-Ovest e a son
distribuidis dilunc di une file singule. Altris sepulturis a àn un orientament divergjent e a
somein metudis in maniere casuâl.
Tra i pôcs elements di furniment a son stâts cjatâts pietins di vues, fûs circolârs di telâr,
un rincjin di ram, insiemi cun framents ocasionâi di ceramiche a impast grês.
La analisi antropologjiche, ancjemò in vore, e à permetût pal moment di fissâ il ses
des personis soteradis, pal plui feminis adultis di variis etâts, e di individuâ patologjiis,
fraturis e fenomens di fruiament leâts aes lôr ativitâts di vore.
La tipologjie de necropoli “a file” e i elements di furniment a permetin di sostignî une
datazion di epoche alte medievâl: daûr di une prime ipotetiche interpretazion, al podarès
tratâsi di une comunitât di popolazion autoctone che si è insediade tra lis ruvinis de vile
rustiche romane li dongje.
Triest, 31/03/22
Ufici Comunicazion e Promozion de Sorintendence Archeologjie, bielis arts e paisaç dal Friûl-Vignesie Julie
http://www.sabap.fvg.beniculturali.it
![](https://i0.wp.com/newsite.agenparl.eu/wp-content/uploads/2023/07/materiali.jpg?w=788&ssl=1)