(AGENPARL) - Roma, 14 Dicembre 2023 - (AGENPARL) – gio 14 dicembre 2023 COMUNICÂT STAMPE
PRESENTAZION DES INIZIATIVIS
PAI CENT AGNS DE SORINTENDENCE
SABAP100: 1923-2023
100 agns di Patrimoni Culturâl in Friûl-Vignesie Julie
PRESENTAZION
e ESPOSIZION AL PUBLIC DI UN REPERT ECEZIONÂL
L’elm di gjenar Negau de Grote dal Elm di Monrupin / Repentabor
Palaç Econom – Salon Piemontês
Place de Libertât, 7 – Triest
JOIBE AI 14 DI DICEMBAR DAL 2023
aes 11.00
Joibe ai 14 di Dicembar al è stât presentât ae stampe il program des celebrazions
che, tacant dai prins mês dal an prossim, la Sorintendence Archeologjie, bielis arts e
paisaç dal Friûl-Vignesie Julie e vûl inviâ intes dôs sedis di Triest e di Udin par
ricuardâ i 100 agns de sô fondazion.
A son intervignûts Andrea Pessina, Sorintendent, Vincenzo Giampaolo, funzionari
architet, Claudia Crosera, funzionarie storiche de art, Paola Ventura, funzionarie
archeolighe, Serena Vitri, za funzionarie archeolighe de Sorintendence.
Il cicli di incuintris e la mostre fotografiche
Lis iniziativis par celebrâ i 100 agns di vite de Sorintendence a previodaran trê
zornadis di studi e une mostre fotografiche: il fin al è di ricuardâ i moments
principâi de nassite e de prime formazion de istituzion che e cure lis ativitâts di tutele
in regjon; in plui, si vûl fevelâ des ativitâts plui significativis che a àn viodût la
Sorintendence impegnade in cualchidun dai moments plui dramatics de storie
regjonâl, par esempli il prin dopovuere, la seconde vuere mondiâl e il taramot dal
1976.
Intes zornadis di studi si fasaran ancje riflessions di aprofondiment sui setôrs
diferents dulà che in dì di vuê si esercitin la tutele e la valorizazion dal patrimoni
culturâl.
I trê focus sielts a son:
La difese dal patrimoni artistic tra vueris e calamitâts naturâls;
Lis formis de tutele intal tierç mileni;
e di ultin, une cjalade ae protezion dal contemporani cu la zornade intitulade
Atenzion: fragjil! Riflessions su la tutele de architeture dal secul XX.
Il cicli di incuintris al à il fin di ilustrâ ae coletivitât lis ativitâts che e fâs la
Sorintendence, metint l’acent sul so operât tant che moment di riflession su lis
dinamichis di tutele e di conservazion, di cuant che e je stade istituide fin a vuê. Al
sarà un moment par confrontâ modalitâts, pratichis e esperiencis di conservazion
dilunc di un secul di storie, ancje midiant des ativitâts fatis di cualchi an in ca, tacant
de riorganizazion dai archivis documentâi e fotografics, che a son ae fonde des azions
conservativis dai bens culturâi.
Par cheste reson, di là dai incuintris, si previôt la preparazion di une mostre
fotografiche intes dôs sedis de Sorintendence, o ben, tal Palaç Econom di Triest e
tal Palaç Clabassi di Udin. Midiant di une schirie di imagjins, la mostre e contarà la
ativitât dal ufici, de sô fondazion fin a vuê, ilustrant il lavôr fat in chescj prins cent
agns inte nestre regjon, intes diviersis dissiplinis che a interessin i bens culturâi.
La presentazion dal elm di bronç di gjenar Negau de Grote dal Elm tal Comun
di Monrupin / Repentabor
L’incuintri di joibe al è stât ancje la ocasion par presentâ al public, pe prime volte, la
scuvierte archeologjiche resinte fate inte Grote dal Elm tal Comun di Monrupin /
Repentabor che e je di grant interès: al è un elm di bronç di gjenar Negau al è stât
restaurât di pôc dai tecnics/restauradôrs de Sorintendence.
L’elm al è stât scuviert intune ativitât speleologjiche sul fonts de grote a poç, a une
otantine di metris di profonditât; al è simil di un prin esemplâr – cumò esponût intal
Museu Civic di Antichitâts “J. J. Winckelmann” di Triest – cjatât tal 1929 inte stesse
cavitât carsiche che e je dongje dal impuartant cjastelîr di Monrupin, atîf de seconde
metât dal II mileni p. di C. e fin al secul V p. di C.
Dopo de scuvierte, par capî miôr il contest, si son fatis ricercjis preliminârs di
verifiche, sot de Direzion sientifiche de Sorintendence, che a àn furnît plui elements
par aprofondî la cognossince dal repert.
Intune des verifichis fatis tal fonts de grote, in corispondence dal coni detritic, te base
dal inglotidôr, si son cjatâts fûr ancje une manarie di fier dal gjenar “a aletis
superiôrs” (datade salacor no prime dal secul VI p. di C.) e un grum di segns de
presince di faune antighe.
Po dopo, l’elm al è stât restaurât tal laboratori de Sorintendence: l’obietîf al jere la
conservazion e podê valorizâ i particolârs de superficie midiant de pulidure. Chescj
intervents a àn permetût di viodi sot dal stât grues des incrostazions la decorazion che
e je te part basse de calote. I detais che a son vignûts fûr a rindin chest ogjet un
unicum dal so gjenar: di fat, la diference principâl che al à chest elm, a pet dai
esemplârs simii slovens, e di chel altri elm “zimul”, e je la assence des decorazions “a
palmute”. Pe tipologjie de lavorazion, chest manufat si pues assegnâ a une buteghe
artesanâl di nivel alt, come i altris esemplârs slovens; al fâs part di une cualitât di
elms difondûts inte zone alpine sudorientâl, che si pense derivâ dal elm italoetrusc.
Tipologjiis similis si atestin a tacâ dal tart secul V p. di C. in tantis localitâts di chê
che vuê e je Slovenie.
Come il prin elm che al jere za stât cjatât inte grote, ancje chest chi al mostre di vê
cjapât un colp, dât cun probabilitât cuntune manarie, o intun scuintri, o pûr dopo di
un at intenzionâl di defunzionalizazion rituâl.
Duncje, cheste gnove scuvierte e à permetût di rivalutâ la impuartance de Grote dal
Elm, che forsit e jere une des cavitâts dopradis tant che busigatui votîfs di armis:
di chescj, l’esempli plui famôs de aree carsiche al è la Grote des Moscjis di S.
Canzian dal Cjars / Škocjan in Slovenie.
Revision e traduzion dai tescj par cure dal Sportel regjonâl pe lenghe furlane de ARLeF
Revisione e traduzione dei testi eseguite dallo Sportello regionale per la lingua friulana dell’ARLeF.
Triest, ai 14 di Dicembar dal 2023
Ufici Comunicazion e Promozion de Sorintendence Archeologjie, bielis arts e paisaç dal Friûl Vignesie Julie

Soprintendenza Archeologia, belle arti e paesaggio del Friuli Venezia Giulia

https://www.facebook.com/SABAP.FVG